Cynllun Pensiwn Heddlu

Os ydych yn marw yn ystod eich gwasanaeth i’r heddlu, a bwrw eich bod yn aelod o Chynllun 1987 ar adeg eich marwolaeth (a heb adael y Cynllun), bydd cyfandaliad grant marwolaeth ddwywaith swm eich cyflog pensiynadwy blynyddol yn cael ei dalu i’ch priod neu bartner sifil sy’n eich goroesi. Os nad oes priod neu bartner sifil yn eich goroesi, bydd yn cael ei dalu i’ch cynrychiolydd personol - fel arfer Ysgutor eich ewyllys, ac felly bydd yn llunio rhan o’ch Ystâd.

Os ydych yn gweithio’n rhan-amser, bydd y cyfandaliad ddwywaith eich cyflog pensiynadwy blynyddol fel gweithiwr rhan-amser.

Enghraifft

Cyflog cyfwerth â llawn amser Tony yw £30,000 y flwyddyn, ond mae’n gweithio 32 awr yr wythnos, felly ei gyflog pensiynadwy blynyddol yw £24,000 y flwyddyn (32/40 x £30,000).

Pe byddai’n marw mewn swydd ac yntau’n aelod o Chynllun 1987, y cyfandaliad grant marwolaeth fyddai’n daladwy ar ei farwolaeth fyddai £48,000 (2 x £24,000).

Nid yw hyd y gwasanaeth yn berthnasol i’r grant marwolaeth a fydd yn cael eu dalu.

• Buddion Goroeswyr

  Pan fyddwch chi’n marw, mae’n bosibl y bydd eich Goroeswyr (a all gynnwys eich gwraig weddw, gŵr gweddw neu bartner sifil a phlant) yn gymwys i gael buddion o Gynllun 1987. Bydd y buddion a fydd yn daladwy’n dibynnu ar a ydych yn marw mewn swydd neu ar ôl ichi ymddeol, a hyd eich gwasanaeth pensiynadwy ar ddyddiad eich marwolaeth.

  Mae oedolion sy’n oroeswyr o dan Gynllun 1987 yn cynnwys gwragedd gweddw, gŵyr gweddw a phartneriaid sifil, ond NID cydbreswylwyr nad oeddent yn briod neu mewn partneriaeth sifil. Ers 5 Rhagfyr 2005, mae pâr mewn partneriaeth sifil yn cael ei drin mwy neu lai yn yr un ffordd â phâr priod.

  Mae gwahaniaethau yn y ffordd y caiff gwasanaeth ei gyfrif at ddibenion dyfarndaliadau i wragedd gweddw, gŵyr gweddw a phartneriaid sifil. Mae gan wraig weddw hawl i bensiwn wedi’i seilio ar holl wasanaeth pensiynadwy’r Swyddog ymadawedig, os oedd hi’n briod â’r Swyddog cyn iddo beidio â bod yn Swyddog Heddlu rheolaidd ac os oedd hi’n briod ag ef pan fu ef farw. Os priododd y pâr ar ôl i’r Swyddog ymddeol, bydd gan y wraig weddw hawl i bensiwn wedi’i seilio ar wasanaeth y swyddog ar ôl 5 Ebrill 1978 yn unig.

  Mae pensiynau cyffredin, arbennig, mwy a chronedig gŵyr gweddw’n daladwy yn yr un ffordd ag ar gyfer gwragedd gweddw heblaw bod y dyfarndaliad yn hawl safonol mewn perthynas â gwasanaeth Swyddog benyw ar ôl 16 Mai 1990 yn unig. Dim ond pensiwn â lleiafswm gwarantedig i ŵr gweddw mae gwasanaeth cyn hynny, o 6 Ebrill 1988, yn ei ddarparu.

  Mae’r buddion sydd ar gael i wragedd gweddw a gŵyr gweddw, gan gynnwys hawliau i bensiynau cyffredin, arbennig, mwy a chronedig a’r cynnydd 13 wythnos, yn cael eu talu yn yr un ffordd i bartneriaid sifil, heblaw nad yw’r hawl yn berthnasol ond i wasanaeth a gwblhawyd ar ôl 5 Ebrill 1988.

• Pensiynau Plant

  Os ydych yn marw mewn swydd neu pan ydych yn derbyn pensiwn o dan Cynllun 1987, neu ar ôl i chi adael gwasanaeth yr heddlu gyda hawl i bensiwn gohiriedig, bydd pensiwn plant yn daladwy i’ch plant cyfreithlon neu fabwysiedig, ond nid i blant (yn cynnwys llysblant) o briodas a gynhaliwyd yn ystod eich ymddeoliad nac i blant a fabwysiadwyd yn ystod eich ymddeoliad. Mae’r un dyfarndaliadau yn daladwy i’ch plant boch chi’n Swyddog gwryw neu’n Swyddog benyw.

  Mae oed eich plant hefyd yn effeithio ar eu cymhwyster i dderbyn dyfarndaliadau. Os ydynt yn 18 oed neu’n hŷn, nid oes pensiwn yn daladwy oni fônt yn derbyn addysg neu hyfforddiant llawn amser, neu’n sylweddol ddibynnol arnoch ar amser y farwolaeth. Gall y diffiniad gynnwys: llysblant, plant mabwysiedig a phlant anghyfreithlon. Os ydych yn marw ar ôl gadael Cynllun 1987, rhaid i’r plant fod wedi bod yn sylweddol ddibynnol arnoch a hynny ar yr adeg yr oedd eich gwasanaeth yn dod i ben ac ar eich marwolaeth.

  Bydd unrhyw bensiwn i blant a ddaeth yn daladwy ar, neu ar ôl, 6 Ebrill 2006 yn peidio ar iddynt gyrraedd 23 oed, oni fo’r plentyn yn ddibynnol arnoch oherwydd ei fod yn anabl ar ddyddiad eich marwolaeth.