Cynllun Pensiwn Heddlu

Gallwch ddewis cynyddu eich darpariaeth pensiwn o dan Cynllun 1987, yn neilltuol os na fydd modd i chi grynhoi 30 mlynedd o wasanaeth pensiynadwy cyn cyrraedd yr oed y bwriadwch ymddeol. Mae gennych y dewis o brynu rhagor o fudd-daliadau drwy ‘flynyddoedd ychwanegol’, ond efallai eich bod eisioes yn talu Cyfraniadau Gwirfoddol Ychwanegol (CGY) i brynu rhagor o fudd-daliadau ar gyfer eich hun/priod drwy Standard Life.

• Ychwanegu at eich Aelodaeth

  Os nad ydych yn gymwys i dderbyn uchafswm y pensiwn oherwydd nad oes modd i chi gwblhau 30 mlynedd o wasanaeth pensiynadwy erbyn cyrraedd oed ymddeol gorfodol, mae’n bosib y gallwch brynu gwasanaeth ychwanegol i gynyddu eich budd-daliadau ar ymddeol. Bydd y gyfradd gyfrannu hon yn ddrytach na’r gyfradd gyfrannu arferol, gan NA fydd Heddlu Dyfed-Powys, sy’n talu at eich budd-daliadau sylfaenol, yn cyfrannu at brynu blynyddoedd ychwanegol. Bydd raid i chi dalu cost lawn y budd-daliadau ychwanegol.

  Ni all gwasanaeth a gronnwyd yn Cynllun 1987, ynghyd ag unrhyw fudd-daliadau ychwanegol a brynwyd, fod yn fwy na 40/60. Ni allwch brynu blynyddoedd ychwanegol i dalu am seibiant gyrfa, os ar ddychwelyd i weithio, bydd modd i chi gronni 30 mlynedd o wasanaeth erbyn eich bod yn 55 oed.

  Fel arfer, mae prynu ‘blynyddoedd ychwanegol’ yn golygu ymrwymiad hirdymor i dalu cyfraniadau nes yr ydych yn ymddeol neu’n gadael Cynllun 1987. Caiff eich cyfraniadau ar gyfer budd-daliadau ychwanegol eu cyfrif fel canran o’ch cyflog ac felly byddant yn cynyddu bob tro y mae eich cyflog yn cynyddu, yn yr un modd â’r budd-daliadau a ddarperir gan y pryniant. Tynnir eich cyfraniadau i ychwanegu eich budd-daliadau o’ch cyflog cyn tynnu treth.

  Gellir dewis talu cyfraniadau rheolaidd ar unrhyw adeg cyhyd â bod 2 flynedd o leiaf rhwng eich pen-blwydd nesaf ac oed ymddeol gorfodol.

  Os ydych yn ymddeol cyn y dyddiad yr oeddech wedi bwriadu ymddeol, neu’n gadael y gwasanaeth gyda hawl i bensiwn gohiriedig neu werth trosglwyddo, bydd cyfran briodol o’r budd-daliadau ychwanegol yr oeddech yn eu prynu yn cael eu credydu i chi.

  Dalier Sylw

  Os ydych yn marw neu’n ymddeol oherwydd salwch a chithau wedi prynu, neu wrthi’n prynu, blynyddoedd ychwanegol, bydd cyfanswm y blynyddoedd ychwanegol yr oeddech wedi dewis eu prynu yn cael eu credydu i chi.

• Cyfraniadau Gwirfoddol Ychwanegol (CGY)

  Os ymrwymoch i drefniant Cyfraniadau Gwirfoddol Ychwanegol (CGY) ar neu cyn 30 Medi 2010, byddwch yn gwbl ymwybodol o’i fuddion a’ch opsiynau pan ydych yn ymddeol. Mae’r cyfraniadau a wnewch yn golygu gostyngiad yn y dreth, gan y cânt eu didynnu o’ch tâl cyn i dreth incwm gael ei ddidynnu.

  Mae gennych ddewis o gronfeydd i fuddsoddi’ch Cronfa CGY ynddynt, a gellir eu newid ar unrhyw adeg. Pan ydych yn ymddeol, gallwch ddefnyddio’ch cronfa CGY i:

  • brynu blwydd-dal gyda Standard Life, neu ddarparwr arall ar y farchnad agored;
  • cymryd hyd at 25% o werth y gronfa fel arian parod di-dreth, a phrynu blwydd-dal gyda’r gweddill.

  Os ydych yn marw cyn ymddeol, ni ellir defnyddio’ch CGY i ddarparu pensiwn, ond caiff y gronfa CGY ei thalu i’r Heddlu. Yn ôl ei ddisgresiwn, caiff y gronfa ei thalu wedyn i’ch priod neu bartner sifil neu, os nad oes person o’r fath, i’ch Ystad.

  Os ydych wedi dewis talu cyfraniadau budd-dal marwolaeth i ddarparu yswiriant bywyd uwchben y lefel a ddarparwyd gan Gynllun 1987 ar gyfer marwolaeth mewn swydd h.y. dwywaith eich tâl pensiynadwy, byddwch yn ymwybodol bod Cyllid a Thollau Ei Mawrhydi’n caniatáu taliadau budd-dal marwolaeth o hyd at 4 gwaith y tâl cydnabyddiaeth terfynol. Mae hyn yn gadael lle ichi gynyddu budd-daliadau marwolaeth o hyd at 4 gwaith eich enillion gros blynyddol. Gallwch roi’r gorau i dalu’ch cyfraniadau budd-dal marwolaeth ar unrhyw adeg, ac os gwnewch hynny bydd eich yswiriant yn dod i ben. Fel yn achos unrhyw yswiriant, ni chewch ad-daliad o’r cyfraniadau a wnaethpwyd eisoes.

  Dalier Sylw

  Nodwch bod y trefniant CGY wedi cau i gyfranwyr newydd o 1 Hydref 2010. Mae hyn yn golygu hyd yn oed, NI fydd gyfranwyr presennol galli cynyddu eu cyfraniadau, ac ni fyddwch galli drosglwyddo unrhyw fudd-daliadau CGY eraill i mewn i'ch cronfa.