Cynyddu eich Buddion

Fel aelod o'r Cynllun Pensiwn Llywodraeth Leol (CPLlL), mae gennych gyfle i wneud cyfraniadau ychwanegol i'ch buddion ymddeol.

Mae'r CPLlL yn cynnig dwy ffordd dreth-effeithlon o wneud hynny:

• Cyfraniadau Gwirfoddol Ychwanegol (CGY)
• Cyfraniadau Pensiwn Ychwanegol (CPY)

Hefyd mae'n bosibl y byddwch am ystyried trefniadau preifat y tu allan i'r cynllun, megis Cynllun Pensiwn Personol / Pensiwn Cyfranddeiliaid neu drefniant Cyfraniadau Gwirfoddol Ychwanegol Rhydd.

Dylid nodi y gellir gwneud cyfraniadau ychwanegol hefyd er mwyn cynyddu lefel y buddion marwolaeth sy'n daladwy petaech yn marw yn y swydd.

A oes unrhyw gyfyngiadau ar gyfraniadau ychwanegol?

Mae rheolau Cyllid a Thollau Ei Mawrhydi yn caniatáu ichi dalu hyd at 100% o'ch enillion â gostyngiad llawn yn y dreth er darparu buddion o fewn y terfynau a bennwyd. Gan fod eich cyfraniadau arferol i’r CPLlL rhwng 5.5% a 12.5% mae hyn yn gadael cyfran sylweddol o’ch enillion trethadwy i'w buddsoddi mewn cyfraniadau ychwanegol.

Fodd bynnag dylech hefyd gofio am derfyn Lwfans Blynyddol Cyllid a Thollau Ei Mawrhydi, sy'n pennu faint y gall eich buddion pensiwn gynyddu mewn unrhyw flwyddyn benodol h.y. o 1 Ebrill hyd at 31 Mawrth. Y terfyn sydd wedi'i bennu ar hyn o bryd yw £60,000. I gael rhagor o wybodaeth, cysylltwch â Chronfa Bensiwn Dyfed.

• Cyfraniadau Gwirfoddol Ychwanegol (CGY)

  Mae trefniant Cyfraniadau Gwirfoddol Ychwanegol yn eich galluogi i arbed treth yn effeithlon tuag at eich ymddeoliad, a hynny tra byddwch yn aelod gweithredol o'r CPLlL.

  Mae'r cyfraniadau ychwanegol rydych yn dewis eu gwneud yn cael eu didynnu o'ch cyflog cyn bod treth incwm yn cael ei didynnu, sy'n golygu eu bod yn destun 'rhyddhad treth' ar y gyfradd briodol. Wedyn mae'r arian a ddidynnwyd yn cael ei fuddsoddi mewn cronfa o'ch dewis chi, gydag un o ddarparwyr Cronfa Bensiwn Dyfed, sef Prudential neu Standard Life.

  Cofiwch fod modd ichi gyfrannu hyd at 100% o'ch cyflog misol (ar ôl i'r holl ddidyniadau statudol gael eu gwneud) i'ch cronfa Cyfraniadau Gwirfoddol Ychwanegol, hyd nes y clywir yn wahanol. Hefyd gallwch ddiweddaru eich lefel gyfrannu fel y mynnwch, yn ogystal â newid y gronfa rydych am fuddsoddi ynddi.

  Pan fyddwch yn ymddeol, gallwch dderbyn rhywfaint neu'r cwbl o'ch cronfa CGY fel cyfandaliad di-dreth (yn amodol ar derfynau Cyllid a Thollau Ei Mawrhydi).

  Aswiriant Bywyd Ychwanegol

  Gallwch hefyd dalu CGY i ddarparu aswiriant bywyd ychwanegol. Mae’r CPLlL eisoes yn darparu yswiriant sy’n werth 3 gwaith eich cyflog os ydych yn marw mewn swydd, ond gallwch gynyddu’r swm hwn neu ei ddefnyddio i ddarparu budd-daliadau ychwanegol ar gyfer eich dibynyddion os byddwch yn marw mewn swydd. Gallai hyn fod yn amodol ar lenwi holiadur meddygol yn foddhaol.

  Gwybodaeth Ychwanegol

  I gael rhagor o wybodaeth am opsiwnau CGY ewch i AVCWISE.

   

  Dalier Sylw

  Os ydych wedi'i cyflogi gan Cyngor Sir Gâr, Cyngor Sir Benfro, Cyngor Sir Ceredigion a Gwasanaeth Tân ac Achub Canolbarth a Gorllewin Cymru, cysylltwch â'ch Cyflogwr (adran Gyflogres) i gael mwy o wybodaeth am y trefniant AVC Wise.

  Gwefannau Perthnasol

  • Prudential

    https://www.pru.co.uk/rz/localgov/?utm_source=redirect&utm_medium=301&utm_campaign=/rz/localgov/england-wales/literature/?utm_source=redirect&utm_medium=301&utm_campaign=/rz/localgov/england-wales/literature/
• Cyfraniadau Pensiwn Ychwanegol (CPY)

  Fel aelod o'r Cynllun Pensiwn Llywodraeth Leol (CPLlL), gallwch ddewis prynu pensiwn blynyddol ychwanegol, a gaiff ei ychwanegu wedyn at eich 'pensiwn sylfaenol' a'i dalu ichi bob blwyddyn yn ystod eich ymddeoliad. Bellach gelwir hyn yn gontract Cyfraniadau Pensiwn Ychwanegol (a adwaenid gynt yn drefniant Cyfraniadau Pensiwn Rheolaidd).

  Mwyafswm y pensiwn blynyddol ychwanegol y gellir ei brynu ar hyn o bryd yw £8,344.00.

  Sut y caiff y cyfraniadau ychwanegol eu casglu?

  Er mwyn ichi brynu'r swm pensiwn rydych yn ei ddymuno, caiff cyfraniadau ychwanegol eu didynnu o'ch cyflog bob mis, fel y'u cyfrifir gan Gronfa Bensiwn Dyfed. Rhaid i'r contract fod dros 'gyfnod o flynyddoedd cyfan' a dod i ben cyn eich Oedran Pensiwn Arferol. Fodd bynnag, os dymunwch gallwch ddewis talu dros gyfnod byrrach a hefyd mae modd talu ar ffurf 'cyfandaliad unwaith yn unig'.

  Cofiwch y gallwch ddirwyn eich contract i ben hanner ffordd drwodd. Os byddwch yn penderfynu gwneud hynny, byddwch yn cael eich credydu â'r swm cymesur o bensiwn ychwanegol rydych wedi talu amdano.

  Sut y gallaf amcangyfrif y costau cysylltiedig?

  Caiff cost prynu pensiwn ychwanegol ei seilio ar eich oedran, eich rhyw a'r cyfnod a ddewisir gennych, h.y. boed yn fisol hyd at flwyddyn o'ch dewis chi neu'n gyfandaliad unwaith yn unig.

  A oes unrhyw delerau ac amodau eraill?

  Gan yr ystyrir bod y contract CPY wedi'i dalu'n llawn os bydd yn rhaid ichi ymddeol o achos afiechyd neu os byddwch yn marw yn y swydd fel aelod gweithredol o'r cynllun, mae'n rhaid i Ymarferydd Meddygol Cofrestredig Annibynnol (YMCA) a benodwyd gan eich Cyflogwr gynnal archwiliad meddygol i sicrhau eich bod yn iach. (Cofiwch y bydd disgwyl ichi dalu am yr archwiliad hwn).

  Dalier Sylw

  Dylid nodi, os ydych chi'n ymrwymo i gontract i brynu CPY drwy daliadau rheolaidd, bod y cyfraniadau a dalwch yn amodol ar adolygiad cyfnodol ac y gallent gynyddu yn y dyfodol.  Os yw hyn yn berthnasol, bydd Cronfa Bensiwn Dyfed yn rhoi gwybod i chi am y cyfraniadau diwygiedig sy'n daladwy a bydd y cyfraniadau newydd yn gymwys o fis Ebrill yn dilyn yr adolygiad.

  Cyfrifo'r Gost

  • Cyfrifiannell CPY

    https://www.lgpsmember.org/more/apc/index.php