Gadael y Cynllun

Gallwch adael y Cynllun Pensiwn Llywodraeth Leol (CPLlL) ar unrhyw adeg trwy roi rhybudd ysgrifenedig i'ch cyngor. Os ydych yn dewis gadael, bydd y penderfyniad yn dod i rym ar ddiwedd y cyfnod talu pryd y rhoddwyd y rhybudd, oni bai eich bod wedi nodi dyddiad diweddarach yn eich rhybudd. Argymhellir eich bod yn cael rhagor o wybodaeth cyn dewis gadael y Cynllun.

I adael y Cynllun, cysylltwch â Chronfa Bensiwn Dyfed.

A ydw i'n gallu ailymuno â'r Cynllun yn ddiweddarach?

Os ydych yn dewis gadael unwaith, gallwch ailymuno â'r CPLlL ar unrhyw adeg tra byddwch yn parhau i fod yn gynghorydd cymwys.

Os ydych yn dewis gadael y CPLlL fwy nag unwaith, cewch ailymuno â chaniatâd eich cyngor yn unig, oni bai eich bod yn dewis ailymuno â'r Cynllun cyn pen tri mis o ddechrau fel cynghorydd cymwys gyda chyngor newydd. Gallwch ofyn i'ch cyngor egluro'i bolisi ar y mater hwn.

• Ad-dalu Cyfraniadau

  Os yw cyfanswm eich aelodaeth yn llai na 3 mis, mae'n bosibl y gallech dderbyn ad-daliad o'ch cyfraniadau llai unrhyw ddidyniadau treth.

  Ar y llaw arall, gallech ohirio gwneud penderfyniad hyd nes eich bod yn ailymuno â'r un gronfa CPLlL fel aelod sy’n gynghorydd neu yn barod i dderbyn ad-daliad o'ch cyfraniadau.

• Buddion Gohiriedig

  Os yw cyfanswm eich aelodaeth o'r cynllun yn 3 mis neu ragor, bydd y budd-daliadau a gronnwyd h.y. eich pensiwn a'ch cyfandaliad, yn cael eu cyfrifo a'u rhewi yn y Gronfa. Budd-dal Gohiriedig yw'r enw ar hwn.

  Bydd eich budd-daliadau yn parhau i fod yn rhai gohiriedig yn y CPLlL hyd nes y byddant yn daladwy (neu hyd nes y byddwch yn penderfynu eu trosglwyddo). Telir budd-daliadau gohiriedig ar gyrraedd 65 oed (oni ddewisir gohirio’r taliad y tu hwnt i’r oed hwnnw), ond gellir eu talu cyn cyrraedd 65 oed mewn achos o salwch, heb eu lleihau.

  Gallwch hefyd ddewis derbyn eich budd-daliadau'n gynnar, ar gyrraedd 50 oed neu wedi hynny a chyn cyrraedd 55 oed gyda chaniatâd eich Cyngor, neu ar gyrraedd 55 neu wedi hynny heb ganiatâd eich Cyngor. Bydd eich budd-daliadau'n cael eu lleihau os cânt eu talu cyn 65 oed yn sgil talu budd-daliadau'n gynnar (er y gallai rhai o'ch budd-daliadau neu'r cyfan gael eu diogelu rhag lleihad os oeddech wedi ymuno â'r CPLlL cyn 1 Hydref 2006 a'ch bod yn aelod a ddiogelwyd). Bydd modd i'ch cyn-gyngor ddewis rhoi heibio unrhyw leihad yn eich budd-daliadau am resymau tosturiol.

• Trosglwyddo eich Buddion

  Os oes gennych ddiddordeb mewn trosglwyddo gwerth eich hawliau pensiwn cronedig i gynllun pensiwn galwedigaethol arall (y tu allan i Lywodraeth Leol), i gynllun pensiwn personol, i gynllun rhanddeiliaid neu i bolisi prynu allan, gallwch ofyn am ddyfynbris o'r gwerth a drosglwyddir (sef Gwerth Cyfatebol mewn Arian Parod yr hawliau pensiwn a drosglwyddir).

  Dan y darpariaethau a gyflwynwyd gan Ddeddf Pensiynau 1995, rhaid i ddyfynbris fod wedi'i warantu am gyfnod o 3 mis o'r dyddiad y'i cyfrifwyd. Rhaid derbyn hysbysiad ysgrifenedig o'r dewis i fynd rhagddo â'r gwerth trosglwyddo gwarantedig o fewn y cyfnod gwarantedig o 3 mis.

  Os byddwch yn dewis mynd rhagddo, y terfyn amser arferol a roddir i'r Cynllun dalu'r gwerth trosglwyddo gwarantedig yw 6 mis o 'Ddyddiad y Warant'. Os na fydd y Cynllun yn talu o fewn y cyfnod hwn bydd yn rhaid ail gyfrifo'r gwerth ar union ddyddiad y taliad a thalu'r gwerth a ail gyfrifwyd neu, os yw'n fwy, y gwerth gwreiddiol ynghyd â llog. Cyfrifir gwerthoedd a drosglwyddir yn unol â thelerau ac amodau Rheoliadau Cynllun Pensiwn Llywodraeth Leol 1997 (fel y'u diwygiwyd) sy'n cydymffurfio â gofynion Deddf Cynlluniau Pensiwn 1993.