Cynllun Pensiwn Heddlu

Gallwch ddewis gadael Cynllun 2006 ar unrhyw adeg. Os ydych yn dewis gadael yn ystod tair mis gyntaf eich gwasanaeth gyda’r heddlu, bydd eich penderfyniad yn cael ei ôl-ddyddio i’r dyddiad y daethoch yn Swyddog rheolaidd o’r heddlu. Os penderfynwch adael Cynllun 2006 ar unrhyw adeg arall yn y dyfodol, bydd eich penderfyniad yn dod i rym o ddyddiad eich diwrnod cyflog nesaf ar ôl derbyn eich rhybudd i adael y cynllun.

Bydd nifer o ganlyniadau i adael Cynllun 2006, sy'n cynnwys:

• os ydych yn cronni 2 flynedd neu ragor o wasanaeth cymwys yn Cynllun 2006 ac yna’n dewis gadael, ni fydd gennych ond hawl i bensiwn gohiriedig yn unig, a fydd fel arfer yn daladwy ar gyrraedd 65 oed;
• os ydych yn marw mewn swydd ac wedi dewis gadael Cynllun 2006, NI fydd cyfandaliad grant marwolaeth yn daladwy;
• fel rhywun nad yw’n aelod gweithredol o Cynllun 2006, NI fyddwch yn gymwys ar gyfer pensiwn salwch os byddwch yn ymddeol ar sail feddygol, er y byddwch yn gymwys i dderbyn eich pensiwn gohiriedig yn gynnar os ydych yn cael eich asesu yn barhaol anabl ar gyfer pob gwaith rheolaidd.

• Ad-daliad o'ch Cyfraniadau

  Os ydych yn gadael gwasanaeth yr heddlu a gennych lai na 2 flynedd o wasanaeth cymwys heb hawl i unrhyw ddyfarndaliadau eraill o dan Chynllun 2006, gallwch ofyn am ad-daliad o’ch cyfraniadau pensiwn, llai’r didyniadau ar gyfer treth.

  Dylech nodi mai’r unig gyfraniadau a gaiff eu had-dalu yw'r rheiny a dalwyd gennych chi, ond y bydd y gwerth trosglwyddo yn adlewyrchu cyfanswm gwerth y budd-daliadau pensiwn.

  Os ydych yn gadael y gwasanaeth a gennych lai na 2 flynedd o wasanaeth cymwys, heblaw eich bod yn barhaol anabl o ganlyniad i anaf a gafwyd wrth gyflawni eich dyletswyddau, bydd y pensiwn a dderbyniwch yn gyfandaliad sy’n cyfateb i’ch cyfraniadau pensiwn.

• Buddion Gohiriedig

  Mae gennych hawl i bensiwn gohiriedig os ydych dan 55 oed a gennych 2 flynedd o leiaf o wasanaeth cymwys, ac yr ydych naill ai’n gadael yr heddlu, neu’n peidio â bod yn aelod o Chynllun 2006 drwy adael y Cynllun, heb drosglwyddo eich hawliau pensiwn i gynllun pensiwn arall.

  Bydd y pensiwn gohiriedig yn seiliedig ar eich gwasanaeth pensiynadwy a’ch cyflog pensiynadwy terfynol ar y dyddiad yr oeddech yn gadael yr heddlu neu’n gadael y Cynllun. Bydd yn cael ei gynyddu ar gyfer chwyddiant o’r adeg yr ydych yn gadael y llu neu’r Cynllun hyd at y dyddiad y bydd yn dod yn daladwy (dan ddeddfwriaeth Deddf Cynyddu Pensiynau).

  Os ydych yn gadael y gwasanaeth neu’r Cynllun cyn eich bod yn 55 oed, dim ond hawl i bensiwn gohiriedig yn unig fydd gennych, waeth faint o wasanaeth pensiynadwy sydd gennych. Bydd eich pensiwn gohiriedig yn daladwy ar gyrraedd 65 oed, heb ostyngiad.

  Fodd bynnag, gallwch ddewis derbyn eich pensiwn gohiriedig cyn eich bod yn cyrraedd 65 oed, ond bydd y swm yn cael ei leihau oherwydd ei dalu’n gynnar. Gelwir hyn yn ‘leihad actiwaraidd’ ac mae’n adlewyrchu’r ffaith bod y pensiwn yn cael ei dalu’n gynharach ac am gyfnod hwy. Dylech sylweddoli y gallai’r lleihad fod yn sylweddol (gellir disgwyl iddo fod oddeutu 5% am bob blwyddyn, fel y gallai pensiwn gohiriedig a delir ar gyrraedd 60 oed fod 25% yn llai) ac y bydd y lleihad hwn i’ch pensiwn yn barhaol (ond ni effeithir pensiwn i oroeswyr). Mae’r lleihad yn effeithio’r pensiwn blynyddol a’r cyfandaliad fydd yn 4 gwaith y pensiwn blynyddol wedi’i leihau.

  Telir eich pensiwn gohiriedig yn gynnar heb leihad actiwaraidd os ydych wedi gadael gwasanaeth yr heddlu ac yn barhaol anabl ar gyfer pob gwaith rheolaidd.

• Trosglwyddo eich Buddion

  Os ydych yn gadael neu’n dewis peidio â chyfrannu bellach i Chynllun 2006 cyn cyrraedd oed pensiwn, mae gennych ddewis ynghylch beth i’w wneud â’ch budd-daliadau. Os yw eich gwasanaeth heddlu ynghyd ag unrhyw wasanaeth cymwys cysylltiedig (h.y. gwasanaeth cymwys a gariwyd o gynllun pensiwn arall drwy werth trosglwyddo) yn llai na 3 mis, caiff eich cyfraniadau eu had-dalu.

  Os yw eich gwasanaeth heddlu ynghyd ag unrhyw wasanaeth cymwys cysylltiedig yn fwy na 3 mis ond mae cyfanswm eich gwasanaeth cymwys yn llai na 2 flynedd, mae gennych y dewis i drosglwyddo eich hawliau pensiwn i gynllun pensiwn arall, neu ad-dalu eich cyfraniadau.
  Os oes gennych 2 flynedd neu fwy o wasanaeth cymwys (neu os ydych wedi trosglwyddo hawliau pensiwn i Chynllun 2006 o gynllun pensiwn personol) eich dewis yw trosglwyddo eich hawliau pensiwn i gynllun pensiwn arall, neu cadw’r budd-daliadau gohiriedig yn Cynllun 2006.

  Mae nifer o faterion i’w hystyried cyn trosglwyddo:

  • rhaid i chi wneud cais am daliad trosglwyddo o fewn 6 mis o adael gwasanaeth yr heddlu neu o adael Cynllun 2006 (estynnir y cyfnod hwn i 12 mis ar gyfer trosglwyddo i gynllun yn y sector cyhoeddus) – gall Heddlu Dyfed-Powys ymestyn y terfynau amser hyn yn ôl ei ddisgresiwn;
  • nid oes gennych hawl i bensiwn gohiriedig o Chynllun 2006 os ad-dalwyd eich cyfraniadau – ni fydd trosglwyddo’n bosib heb i chi fod wedi talu’r ad-daliad yn ôl gyntaf;
  • ni fydd modd i chi drosglwyddo os ydych o fewn blwyddyn o gyrraedd 60 oed;
  • ni fydd y gwerth trosglwyddo o reidrwydd yn prynu’r un hyd o wasanaeth yn y cynllun newydd – dylai brasamcan gan y cynllun newydd roi awgrym o’r gwerth;
  • gall ystod a math y budd-daliadau a gynigir gan gynllun arall fod yn gwbl wahanol i’r rheiny a gynigir gan Cynllun 2006.

  Dalier Sylw

  Mae'r Llywodraeth wedi gwahardd unrhyw drosglwyddiadau o gynlluniau pensiwn gwasanaeth cyhoeddus heb eu hariannu (megis y Cynlluniau Pensiwn Heddlu) i Gynlluniau Pensiwn Cyfraniad Diffiniedig a threfniadau budd-daliadau hyblyg eraill o'r 6ed Ebrill, 2015.