Cynllun Pensiwn Heddlu

Os byddwch yn marw tra byddwch yn aelod gweithredol (a bod eich gwasanaeth am 12 mis o leiaf), bydd cyfandaliad grant marwolaeth o 3 gwaith eich Enillion Pensiynadwy blynyddol ar adeg eich marwolaeth (Cyflog Terfynol) yn cael ei dalu:

• i’ch priod neu bartner sifil sy’n goroesi;
• os nad oes gennych briod, neu bartner sifil yn ôl disgresiwn y Llu Heddlu, i bartner a ddatganwyd;
• os nag oes gennych briod, partner sifil, na phartner a ddatganwyd yn ôl disgresiwn y Llu Heddlu, i unigolyn a enwebwyd gennych chi;
• fel arall, i’ch cynrychiolydd cyfreithiol personol – Ysgutor eich Ewyllys fel arfer – a bydd felly yn rhan o’ch Ystâd.

Os dymunwch enwebu rhywun i gael eich cyfandaliad grant marwolaeth, dylech lenwi ffurflen Mynegi Dymuniad Grant Marwolaeth (y gallwch ei chael gan eich gweinyddwr pensiynau). Nid yw enwebiad yn drech na’r ddarpariaeth y bydd y grant yn mynd i briod sy’n goroesi, partner sifil neu bartner a ddatganwyd, os oes gennych un, ond fe fyddai’n dod i rym os nad oes gennych briod, partner sifil na phartner a ddatganwyd neu petaech chi a’ch priod, partner sifil neu bartner a ddatganwyd yn marw ar yr un pryd.

Sylwer nad yw enwebiad am gyfandaliad grant marwolaeth yr un fath â datganiad partner a ddatganwyd. Mae’r enwebiad ar gyfer cyfandaliad grant marwolaeth yn ymwneud yn unig â thalu’r grant hwnnw.

Enghraifft

Mae aelod rhan-amser o’r Llu Heddlu yn marw tra bydd yn aelod o Gynllun 2015. Pan fu hi/ef farw roedd ei H/Enillion Pensiynadwy blynyddol yn £8,400 y flwyddyn a’i g/chyflog cyfatebol llawn amser yn £21,000 y flwyddyn.

Y cyfandaliad grant marwolaeth fyddai’n daladwy ar ei f/marwolaeth fyddai £8,400 × 3 = £25,200.

• Buddion Goroeswyr

  Pan fyddwch farw, gall eich Goroeswyr (sy’n cynnwys eich priod, partner sifil, partner cyd-fyw nad yw yn bartner sifil a phlant cymwys) fod â hawl i dderbyn buddion. Bydd y buddion a all fod yn daladwy yn dibynnu:

  • a fyddwch yn marw yn aelod gweithredol, yn aelod gohiriedig neu yn aelod sy’n bensiynwr;
  • a fyddwch yn marw ar ôl gadael y llu heddlu neu ar ôl i chi ddewis eithrio; a
  • hyd y Gwasanaeth Cymwys ar ddyddiad eich marwolaeth.

  Os ydych wedi dewis optio allan neu eich bod wedi gadael y Llu Heddlu ar ddyddiad eich marwolaeth, byddai unrhyw fuddion goroeswyr yn seiliedig ar unrhyw Bensiwn Gohiriedig yr oedd gennych hawl iddo ar y pryd.

  Gall oedolion sy’n goroesi gynnwys eich priod, partner sifil a phartneriaid cyd-fyw a nad ydynt yn bartneriaid sifil. Dan Gynllun 2015 mae’r holl bensiynau i oedolion sy’n goroesi yn daladwy am oes, boed y goroeswr yn ailbriodi neu’n ffurfio partneriaeth newydd neu beidio. Os yw’r oedolyn sy’n goroesi yn aelod hefyd o Gynllun 2015 mae ganddo ef/ganddi hi yn dal hawl i fudd oedolyn sy’n goroesi.

  Mae gan eich priod neu bartner sifil hawl i bensiwn o Gynllun 2015 os byddwch farw tra byddwch yn derbyn pensiwn, neu â hawl i dderbyn Pensiwn Gohiriedig pan fyddwch yn cyrraedd eich Oedran Pensiwn Wladwriaeth (OPW). Yn gyffredinol, mae’r pensiwn taladwy yn 50% o’ch hawl pensiwn ar ddyddiad eich marwolaeth.

  Os byddwch farw tra byddwch yn aelod gweithredol, a bod gennych o leiaf 2 flynedd o wasanaeth cymwys, mae gan eich priod neu bartner sifil hawl i bensiwn pan fyddwch farw. Mae’r pensiwn taladwy yn 50% o’r pensiwn afiechyd y byddech wedi ei dderbyn petaech yn anaddas yn feddygol yn barhaol i waith arferol ar adeg eich marwolaeth.

  Partner cyd-fyw yw rhywun y mae gennych berthynas tymor hir ag ef neu hi ond nad ydych yn briod nag mewn partneriaeth sifil. Os oes gennych bartner cyd-fyw nad yw yn briod â chi nag yn bartner sifil i chi, efallai y gall pensiwn goroeswyr gael ei dalu iddo/iddi am oes ar yr un sail â phetai ef/hi wedi bod yn briod neu bartner sifil i chi, ond nid yw hyn yn digwydd yn awtomatig. I bensiwn fod yn daladwy, rhaid i chi gadarnhau bod y canlynol yn berthnasol:

  • eich bod wedi byw gyda’ch gilydd am gyfnod pan fu eich partner yn ddibynnol yn ariannol arnoch, neu eich bod chi eich dau wedi bod yn ddibynnol ar eich gilydd yn ariannol;
  • mae’r berthynas yn un lle mae ymrwymiad i’ch gilydd a neb arall ac yn un tymor hir;
  • eich bod yn rhydd i briodi eich gilydd (neu ffurfio partneriaeth sifil gyda’ch gilydd); ac
  • eich bod yn cytuno i roi gwybod i’r Llu Heddlu os bydd y berthynas yn dod i ben.

  Am fwy o wybodaeth, cyfeiriwch at yr adran priodol yn Canllaw yr Aelodau.

  Dalier Sylw

  Os yw eich priod neu bartner sifil fwy na 12 mlynedd yn iau na chi, bydd ei phensiwn/ei bensiwn yn cael ei ostwng i adlewyrchu’r gwahaniaeth oedran. Bydd y gostyngiad hwn yn 2.5% am bob blwyddyn y mae eich priod neu bartner sifil fwy na 12 mlynedd yn iau na chi, hyd at uchafswm o ostyngiad o 50%.

  Os byddwch yn priodi neu’n llunio partneriaeth sifil 6 mis neu lai cyn dyddiad eich marwolaeth, yna mae gan y Llu Heddlu hawl i ddal y pensiwn sy’n daladwy i’ch priod neu bartner sifil yn ôl.

• Pensiynau Plant

  Os byddwch farw tra byddwch yn aelod gweithredol gyda 2 flynedd o wasanaeth cymwys, yn derbyn pensiwn neu â hawl i dderbyn Pensiwn Gohiriedig pan fyddwch yn cyrraedd eich Oedran Pensiwn Wladwriaeth (OPW), bydd pensiwn yn daladwy i unrhyw blentyn cymwys.

  Plentyn cymwys yw plentyn sy’n blentyn naturiol i chi, yn llysfab neu’n llysferch neu’n blentyn mabwysiedig, ac unrhyw blentyn arall oedd yn sylweddol ddibynnol arnoch (naill ai yn ariannol neu oherwydd anabledd) ar adeg eich marwolaeth.

  Mae buddion i blant cymwys yn daladwy i blant a enir ar ôl eich marwolaeth os yw mam y plentyn yn feichiog ar adeg eich marwolaeth, gan gynnwys y sefyllfa os mai chi yw’r fam a’ch bod yn marw ar enedigaeth y plentyn.

  Yn gyffredinol, mae’r pensiwn sy’n daladwy i blentyn cymwys yn 25% o’ch hawl i bensiwn ar adeg eich marwolaeth, ond os oes tri neu fwy o blant cymwys, mae pob un yn derbyn swm sy’n cyfateb i 50% o’ch hawl pensiwn wedi ei rannu yn ôl y nifer o blant cymwys.

  Mae’r hawl pensiwn at y diben hwn ar yr un sail ag ar gyfer oedolion sy’n goroesi, e.e. os byddwch farw tra byddwch yn aelod gweithredol a bod gennych o leiaf ddwy flynedd o wasanaeth cymwys, mae’n 25% o’r pensiwn afiechyd y byddech wedi ei dderbyn petaech yn anaddas yn feddygol yn barhaol i waith arferol ar adeg eich marwolaeth.

  Dim ond nes y bydd yn cael ei ben-blwydd yn 18 oed y mae plentyn yn parhau yn gymwys oni bai:

  • ei fod ef/ei bod hi mewn addysg llawn amser ar gwrs sydd yn parhau am flwyddyn o leiaf, ac yna mae’r pensiwn yn daladwy tra bydd yr addysg amser llawn yn parhau ond ddim tu hwnt i ben-blwydd y plentyn yn 23; neu
  • nad yw ef/hi yn medru cymryd gwaith arferol oherwydd nam corfforol neu feddyliol sy’n debygol o fod yn barhaol ar ddyddiad eich marwolaeth, ac yna mae’r pensiwn yn daladwy am oes.