Cyfrifo eich Buddion

Os oes gennych ddwy flynedd o leiaf o Wasanaeth Cymwys a’ch bod yn Aelod Gweithredol o Gynllun 2015 byddwch yn gallu ymddeol o’ch oedran pensiwn arferol (OPA) (neu o’ch oedran pensiwn isaf arferol (OPIA) ond bydd hyn yn ddarostyngedig i Ostyngiad Actiwaraidd) gyda phensiwn ar unwaith. Rhaid i aelod gweithredol sydd yn bwriadu ymddeol hawlio taliad y pensiwn, gan roi mis o rybudd ysgrifenedig o leiaf.

Mae gwasanaeth cymwys yn golygu hyd calendr unrhyw gyfnod parhaus o wasanaeth pensiynadwy dan Gynllun 2015 (heb gynnwys unrhyw fwlch mewn gwasanaeth, unrhyw seibiant gyrfa neu unrhyw gyfnod o wyliau di-dâl), ac unrhyw wasanaeth pensiynadwy blaenorol neu waith yr ydych wedi ei drosglwyddo i Gynllun 2015 ac, os yw’n berthnasol, eich cyfnod o wasanaeth pensiynadwy dan Gynllun 1987 neu Gynllun 2006.

Gwasanaeth Pensiynadwy
Mae eich gwasanaeth pensiynadwy dan Gynllun 2015 yn cynnwys:
- Eich gwasanaeth presennol fel aelod gweithredol tra rydych wedi talu cyfraniadau pensiwn i Gynllun 2015 neu pan dybir eich bod yn derbyn Enillion Pensiynadwy (e.e. unrhyw gyfnod di-dâl yn ystod 26 wythnos cyntaf absenoldeb mamolaeth).
- Gwasanaeth blaenorol fel aelod gweithredol yn yr un Llu Heddlu, neu mewn Llu Heddlu arall yng Nghymru a Lloegr, ar yr amod nad oeddech wedi cael bwlch gwasanaeth oedd yn fwy na 5 mlynedd cyn dechrau eich gwasanaeth dan Gynllun 2015 ac na ad-dalwyd cyfraniadau i chi am eich gwasanaeth blaenorol.
- Gwasanaeth blaenorol dan Gynllun Pensiwn Heddlu’r Alban 2015 neu Gynllun Pensiwn Heddlu Gogledd Iwerddon 2015 ar yr amod nad oeddech wedi cael bwlch gwasanaeth oedd yn fwy na 5 mlynedd cyn dechrau eich gwasanaeth dan Gynllun 2015 ac na ad-dalwyd cyfraniadau i chi dan Gynllun Pensiwn Heddlu Gogledd Iwerddon 2015 na Chynllun Pensiwn Heddlu’r Alban 2015.
- Cyfnodau o ‘wasanaeth perthnasol’ dan Adran 97 o Ddeddf Heddlu 1996 (mae hyn yn cynnwys penodiadau i’r Arolygiaeth Cwnstabliaeth a rhai mathau o wasanaeth tramor) yr ydych wedi talu cyfraniadau dan Gynllun 2015 yn ystod hynny (argymhellir i aelodau sy’n ystyried gwasanaethu dramor gael cyngor ar eu sefyllfa o ran pensiwn cyn cytuno i wneud hynny).
Os oes gennych fuddion pensiwn yng nghynllun cyn-gyflogwr neu mewn cynllun pensiwn personol efallai y byddwch yn gallu eu trosglwyddo i Gynllun 2015.
Enillion Pensiynadwy
Mae cyflog sylfaenol, pwysau Llundain, cynnydd yn eich cyflog am ddyrchafiad dros dro, cyflog dros dro a Thaliadau Trothwy Cysylltiedig â Medr (yr olaf i gael ei ddirwyn i ben erbyn Ebrill 2016) yn cyfrif tuag at Enillion Pensiynadwy. Nid yw lwfansau yn bensiynadwy.

Ar gyfer dibenion cyfrifo pensiwn a enillwyd, mae Enillion Pensiynadwy yn cynnwys:
- Y tâl tybiedig am unrhyw elfen â thâl o unrhyw gyfnod o absenoldeb mamolaeth (ac unrhyw absenoldeb mamolaeth heb dâl yn y 26 wythnos cyntaf), absenoldeb mabwysiadu â thâl neu absenoldeb tadolaeth arall ar yr amod nad ydych wedi dewis eithrio allan o Gynllun 2015 yn ystod y cyfnod hwn;
- Y tâl a gymerwyd i fod yn berthnasol i unrhyw gyfnodau o absenoldeb di-dâl (absenoldeb salwch, absenoldeb mamolaeth di-dâl, absenoldeb mabwysiadu di-dâl, absenoldeb cefnogi mamolaeth di-dâl, absenoldeb cefnogi mabwysiadu di-dâl ac absenoldeb tadolaeth di-dâl) y mae cyfraniadau pensiwn wedi cael eu dwyn yn ôl;
- Cyflog yn ystod unrhyw gyfnod o ‘wasanaeth perthnasol’ fel y’i diffinnir dan a.97 o Ddeddf yr Heddlu 1996 y mae cyfraniadau pensiwn wedi cael eu talu amdano.
Cyfrif Pensiwn

Pan fyddwch yn ymddeol, byddwch yn derbyn pensiwn am oes. Ar gyfer pob Blwyddyn Cynllun yr ydych chi yn aelod gweithredol o Gynllun 2015, mae swm y pensiwn a enillwyd yr ydych yn ei grynhoi yn 1/55.3fed o’ch Enillion Pensiynadwy am y flwyddyn honno. Bydd hwn yn mynd i’ch cyfrif pensiwn a enillwyd, sy’n cynyddu o flwyddyn i flwyddyn wrth i ragor o bensiwn a enillwyd gael ei ychwanegu.

Bydd y swm o bensiwn a enillwyd a grynhowyd yn y cyfrif pensiwn yn cael ei uwchraddio yn flynyddol yn unol â CPI + 1.25% tra byddwch yn dal yn aelod weithredol ac yn unol â CPI ar ôl i chi adael Cynllun 2015. Cyfrifir y pensiwn ymddeoliad a enillwyd sy’n daladwy i chi o Gynllun 2015 ar sail y swm o bensiwn a enillwyd a grynhowyd yn y cyfrif pensiwn pan fyddwch yn ymddeol.

Enghraifft

Mae aelod gweithredol sy'n 30 mlwydd oed yn gweithio'n llawn amser ac yn ennill £21,000 y flwyddyn. Cyfrifir ei bensiwn/ei phensiwn a enillwyd a grynhowyd dros ei B/Flwyddyn Cynllun gyntaf fel Aelod Gweithredol fel a ganlyn:

£21,000 / 55.3 = £379.75

Tybiwch bod enillion pensiynadwy’r aelod wedi cynyddu o 1% yn y flwyddyn wedyn i £21,210 a thros y flwyddyn ddiwethaf bod chwyddiant prisiau (sy’n cael ei fesur gan CPI) wedi cynyddu 2%. Bydd cyfanswm ei b/phensiwn yn yr ail Flwyddyn Cynllun wedyn yn cael ei gyfrifo fel a ganlyn:

Gan ei fod ef/ei bod hi wedi parhau yn aelod gweithredol, bydd ei gronfa/ei chronfa o bensiwn a enillwyd a grynhowyd o’r flwyddyn flaenorol yn cynyddu yn unol â CPI + 1.25% ar ddechrau Blwyddyn y Cynllun (gan bod twf CPI yn 2%, byddai hyn yn arwain at gynnydd o 3.25%) - £392.09 (£379.75 + 3.25%).

Yna cyfrifir y pensiwn a enillwyd a grynhowyd dros y flwyddyn hon fel:

£21,210 / 55.3 = £383.54

Cyfanswm cyfrif pensiwn a enillwyd ar ddiwedd Blwyddyn 2 yw £775.63 (£392.09 + £383.54).

Dalier Sylw

Os ydych yn gweithio rhan-amser bydd yr enillion fydd yn cyfrif tuag at eich pensiwn yn gyfatebol lai na petaech yn gweithio llawn amser. Os byddwch yn gweithio llawn amser neu’n rhan-amser mae eich pensiwn yn cael ei gronni yr un ffordd.
Cyfnewid eich Pensiwn

Os byddwch yn dod yn deilwng i gael taliad o bensiwn ymddeoliad, pensiwn gohiriedig neu bensiwn afiechyd dan Gynllun 2015 gallwch ddewis ildio rhan o’ch pensiwn am gyfandaliad. Gelwir hyn yn Gymudo.

Os byddwch yn penderfynu arfer y dewis hwn, am bob £1 y bydd swm eich cyfradd flynyddol o bensiwn ymddeol neu bensiwn salwch yn cael ei ostwng, byddwch yn cael cyfandaliad o £12. NI all eich cyfandaliad cymudo fod yn fwy na 25% o werth eich pensiwn.

Enghraifft

Mae aelod ar fin ymddeol gyda phensiwn o £20,000. Mae ef/hi am gymudo 20% o’i b/phensiwn blynyddol yn gyfandaliad. Byddai ef/hi yn gymwys i gael cyfandaliad o £48,000 (£20,000 x 12 x 20%) a phensiwn adolygedig wrth ymddeol o £16,000 (£20,000 x 80%).

Os dymunwch arfer y dewis hwn i gymudo cyfran o’ch pensiwn am gyfandaliad, bydd raid i chi roi rhybudd ysgrifenedig i’ch Llu Heddlu.

Dalier Sylw

Bydd yn rhaid gwneud y penderfyniad i gymudo eich pensiwn yn gyfandaliad cyn dyddiad eich ymddeoliad.

Dalier Sylw

Os byddwch wedi cyrraedd OPIA a bod gennych hawl i hawlio eich pensiwn yn gynnar a’ch bod naill ai yn aelod gweithredol nad yw wedi cyrraedd OPA neu yn aelod gohiriedig nad yw wedi cyrraedd eich OPA, gallwch ddewis prynu o’r 'gostyngiad actiwaraidd' a fyddai wedi bod yn berthnasol fel arall wrth gyfrifo eich pensiwn blynyddol.

Os byddwch chi yn dewiswch gwneud hyn, gall y taliad i brynu’r gostyngiad actiwaraidd gael ei wneud gennych chi, gan eich Llu Heddlu neu ei rannu rhyngoch chi a'r Llu Heddlu. Bydd cost o brynu’r gostyngiad taliad cynnar allan yn cael ei bennu gan y Llu Heddlu yn unol â chyfarwyddyd actiwaraidd.

Cynllun Pensiwn Heddlu