Cynllun Pensiwn Diffoddwyr Tân

Os byddwch yn absennol am gyfnod o absenoldeb di-dâl awdurdodedig, cewch wneud dewisiad i dalu cyfraniadau yn unol â’ch cyfradd arferol, ar sail y 'tâl pensiynadwy tybiedig', sef y tâl pensiynadwy y byddech wedi ei gael oni bai am yr absenoldeb di-dâl. Caniateir talu nail ai mewn cyfandaliad neu drwy ddidynnu o randaliadau tâl pensiynadwy, fel y cytunir gyda’r Gwasanaeth Tân ac Achub (GTA) ac o fewn terfynau amser penodol

• Absenoldeb Salwch neu Anaf

  Pe byddech yn absennol o’ch cyflogaeth Gynllun oherwydd salwch neu anaf, ac yn derbyn tâl pensiynadwy a / neu dâl statudol, byddech yn parhau i dalu cyfraniadau yn unol â’ch cyfradd ganran arferol ar y tâl pensiynadwy / statudol y byddech yn ei gael. Fodd bynnag, pe na bai hawl gennych i gael tâl pensiynadwy / statudol yn ystod yr absenoldeb, gallech wneud dewisiad i dalu cyfraniadau yn unol â’ch cyfradd ganran arferol, ar sail y tâl yr oeddech yn ei gael yn union cyn iddo ddod i ben. Caniateir talu naill ai mewn cyfandaliad neu drwy ddidynnu o randaliadau tâl pensiynadwy, fel y cytunir gyda’r GTA ac o fewn terfynau amser penodol.

• Absenoldeb cysylltiedig â Phlentyn

  Yn ystod absenoldeb cysylltiedig â phlentyn byddech yn talu cyfraniadau ar ba bynnag gyfradd tâl pensiynadwy a delid ichi (gan gynnwys tâl statudol). Pe na bai hawl gennych I gael unrhyw dâl pensiynadwy / statudol yn ystod cyfnod o absenoldeb mamolaeth, tadolaeth neu fabwysiadu arferol, byddech yn cael eich trin fel pe baech wedi talu’r cyfraniadau.

  Pe na bai hawl gennych i gael unrhyw dâl pensiynadwy / statudol yn ystod cyfnod o absenoldeb mamolaeth ychwanegol, absenoldeb mabwysiadu ychwanegol, absenoldeb rhiant neu absenoldeb rhiant a rennir, gallech wneud dewisiad i dalu cyfraniadau ar sail 'tâl pensiynadwy tybiedig', sef y tâl pensiynadwy y byddech wedi ei gael oni bai am yr absenoldeb. Caniateir talu naill ai mewn cyfandaliad neu drwy ddidynnu o randaliadau tâl pensiynadwy, fel y cytunir gyda’r GTA ac o fewn terfynau amser penodol.

• Absenoldeb Anghydfod Undebol

  Os byddwch yn absennol oherwydd anghydfod undebol, cewch wneud dewisiad i dalu cyfraniadau ar sail eich 'tâl pensiynadwy tybiedig', sef y tâl pensiynadwy y byddech wedi ei gael oni bai am yr absenoldeb. Caniateir talu naill ai mewn cyfandaliad neu drwy ddidynnu o randaliadau tâl pensiynadwy, fel y cytunir gyda’r GTA ac o fewn terfynau amser penodol.

• Absenoldeb Gwasanaeth Lluoedd Wrth Gefn

  Pe baech ar absenoldeb gwasanaeth lluoedd wrth gefn, byddai’n ofynnol ichi dalu cyfraniadau ar eich 'tâl pensiynadwy tybiedig', sef y tâl pensiynadwy y byddech wedi ei gael oni bai am yr absenoldeb (oni fyddech yn gymwys i gael buddion o dan gynllun pensiwn galwedigaethol arall yn ystod y cyfnod hwnnw). Caniateir i’r cyfraniadau gael eu didynnu o unrhyw daliad a wneir ichi, mewn perthynas â’r un cyfnod, o dan Ran 5 o Ddeddf y Lluoedd Arfog Wrth Gefn ac Atodol (Diogelu Buddiannau Sifil) 1951.

  Bydd y GTA yn rhoi, i unrhyw aelod sydd ar fin dechrau cyfnod o absenoldeb gwasanaeth lluoedd wrth gefn, ddatganiad sy’n dangos y tâl pensiynadwy tybiedig am y cyfnod o absenoldeb, y gyfradd gyfraniadau sy’n gymwys, manylion unrhyw daliadau sydd i’w gwneud gan y GTA i’r aelod, a’r gyfradd cyfraniadau cyflogwr sy’n gymwys yn ystod y cyfnod hwnnw. (Byddai’r GTA yn talu cyfraniadau’r cyflogwr ar y tâl pensiynadwy tybiedig).