Cynllun Pensiwn Diffoddwyr Tân

Pe byddech farw tra’n gwasanaethu fel aelod actif o CPT 2015, byddai cyfandaliad o fudd marwolaeth yn daladwy, sef swm cyfwerth â thair gwaith eich tâl terfynol fel yr oedd ar ddyddiad eich marwolaeth. Y tâl terfynol arferol yw’r uchaf o’r canlynol:

• swm tâl pensiynadwy a thâl pensiynadwy tybiedig yr aelod yn ystod ei 365 diwrnod olaf o wasanaeth pensiynadwy di-dor; neu
• swm tâl pensiynadwy a thâl pensiynadwy tybiedig yr aelod yn ystod ei 3 blynedd olaf o wasanaeth pensiynadwy, wedi ei rannu gyda thri.

Pe bai gennych fwy nag un cyfrif aelod actif, byddai cyfandaliad o fudd marwolaeth yn daladwy mewn perthynas â phob un o’r cyfrifon hynny.

Pe byddech farw o fewn 5 mlynedd ar ôl y dyddiad y daeth eich pensiwn yn daladwy, byddai cyfandaliad o fudd marwolaeth yn daladwy, cyfwerth â’r gwahaniaeth rhwng pum gwaith y swm blynyddol o bensiwn a chyfanswm y rhandaliadau o bensiwn a dalwyd h.y. balans o 5 mlynedd.

• Buddion Goroeswyr

  Pan fydd farw aelod o’r Cynllun (boed hynny cyn neu ar ôl ymddeol), ar yr amod bod ganddo o leiaf 3 mis o wasanaeth cymwys, bydd pensiwn yn daladwy i bartner cymwys sy’n goroesi.

  Mae person yn "bartner sy’n goroesi" os yw yn:

  • briod â’r aelod neu’n bartner sifil i’r aelod; neu
  • yn cyd-fyw â’r aelod ac nad yw’n briod â’r aelod hwnnw nac yn bartner sifil iddo, nac i unrhyw berson arall, a gallai ymuno mewn priodas neu bartneriaeth sifil â’r aelod o dan gyfraith Cymru a Lloegr ond nad yw wedi gwneud hynny, ac yr awdurdod wedi penderfynu ei fod yn ddibynnol yn ariannol ar yr aelod neu mewn cyflwr o gyd-ddibyniaeth ariannol gilyddol â’r aelod, a mewn perthynas hirdymor â’r aelod, h.y. perthynas sydd wedi parhau am gyfnod o ddwy flynedd o leiaf, sy’n diweddu ar y dyddiad y digwydd i fater statws y person mewn perthynas â’r aelod gael ei ystyried (neu gyfnod byrrach, yn ôl disgresiwn yr awdurdod).

  Ar yr amod nad yw’r person sy’n goroesi ar ddyddiad y farwolaeth yn fwy na 12 mlynedd yn iau na’r aelod, pensiwn partner sy’n goroesi yn dilyn marwolaeth aelod actif, fyddai 50% o'r pensiwn y byddai hawl gan yr aelod i’w gael ar ddyddiad y farwolaeth, pe bai wedi ymddeol ar sail afiechyd gyda phensiwn afiechyd haen uchaf.

  Neu, yn dilyn marwolaeth aelod gohiriedig, fyddai 50% o bensiwn gohiriedig yr aelod; neu yn dilyn marwolaeth aelod-bensiynwr, fyddai 50% o'r gyfradd pensiwn a oedd yn daladwy i’r aelod yn union cyn y farwolaeth (sef y pensiwn ar ôl unrhyw gymudo neu ddyrannu, ond cyn unrhyw ostyngiad a wnaed oherwydd ymddeol yn gynnar).

  Os yw’r partner sy’n goroesi ar ddyddiad y farwolaeth, yn fwy na 12 mlynedd yn iau, gwneir gostyngiad yn y pensiwn sy’n daladwy, o hyd at 50% o’r pensiwn.

  Dalier Sylw

  Mae pensiwn partner sy’n goroesi yn daladwy am oes. Ni fydd yn peidio o ganlynid i briodi neu ailbriodi, nac o ganlyniad i ymuno mewn partneriaeth newydd.

  Yn ystod y 13 wythnos cyntaf ar ôl marwolaeth aelod, gall Pensiwn Profedigaeth fod yn daladwy i bartner sy’n goroesi. 

• Pensiynau Plant

  Pan fydd farw aelod o’r Cynllun (boed cyn neu ar ôl ymddeol), ar yr amod bod ganddo o leiaf 3 mis o wasanaeth cymwys, bydd pensiwn yn daladwy i blentyn cymwys.

  Ystyr 'plenty' mewn perthynas ag aelod ymadawedig yw plentyn naturiol, llysblentyn neu blentyn mabwysiedig yr aelod; neu plentyn naturiol, llysblentyn neu blentyn mabwysiedig i briod neu i bartner sifil yr aelod, neu i bartner a oedd yn cyd-fyw â’r aelod; neu unrhyw blentyn naturiol yr aelod, a anwyd ar ôl marwolaeth yr aelod, ac yr oedd mam y plentyn yn feichiog â’r plentyn hwnnw ar ddyddiad marwolaeth yr aelod.

  Mae’r plentyn yn 'blentyn cymwys' os:

  • oedd yn ddibynnol yn ariannol ar yr aelod ymadawedig ar ddyddiad marwolaeth yr aelod hwnnw (neu yn achos (c) uchod, byddai wedi bod yn ddibynnol felly pe bai wedi ei eni cyn y farwolaeth);
  • os nad yw’n briod neu mewn partneriaeth sifil; ac
  • os yw’r awdurdod yn penderfynu bod y plenty o dan 18 oed, neu ei fod mewn addysg amser llawn neu ar gwrs sy’n parhau am o leiaf un flwyddyn, ac nad yw’r person wedi cyrraedd 23 mlwydd oed, neu ei fod yn ddibynnol ar yr aelod oherwydd anallu meddyliol neu gorfforol parhaol, ar ddyddiad marwolaeth yr aelod.

  Yn dilyn marwolaeth aelod actif, byddai gan blentyn neu blant cymwys hawlogaeth i 25% o'r pensiwn, y byddai hawl gan yr aelod i’w gael ar ddyddiad y farwolaeth, pe bai wedi ymddeol ar sail
  afiechyd gyda phensiwn afiechyd haen uchaf.

  Yn dilyn marwolaeth aelod gohiriedig, byddai gan blentyn neu blant cymwys hawlogaeth i 25% swm y pensiwn yng nghyfrif gohiriedig yr aelod; ac yn dilyn marwolaeth aelod-bensiynwr, byddai gan blentyn neu blant cymwys hawlogaeth i 25% y gyfradd pensiwn a oedd yn daladwy i’r aelod yn union cyn y farwolaeth (sef y pensiwn ar ôl unrhyw gymudo neu ddyrannu, ond cyn unrhyw ostyngiad a wnaed oherwydd ymddeol yn gynnar).

  Os oes mwy nag un plentyn cymwys, y gyfran yw 50% unrhyw un o’r tri phensiwn a grybwyllir uchod, wedi ei rannu’n gyfartal rhwng y plant. Os digwydd i un o’r plant beidio â bod yn 'blentyn cymwys' byddai’r hanner pensiwn yn cael ei ailddosrannu rhwng y plant eraill.

  Dalier Sylw

  Os oedd buddion yr aelod, ar ddyddiad y farwolaeth, wedi eu lleihau oherwydd Gorchymyn Rhannu Pensiwn, byddai’r gyfran benodedig yn seiliedig ar bensiwn yr aelod fel pe bai’r lleihad heb ei wneud.

  Gall ddigwydd weithiau fod yna blentyn neu blant cymwys, ond neb sydd â hawlogaeth i bensiwn partner sy’n goroesi. Mewn amgylchiadau o’r fath, telir y pensiwn, a fyddai wedi ei dalu i’r partner sy’n goroesi, ei dalu i’r plenty cymwys, neu dosrennir ef rhwng y plant cymwys, a hynny yn ychwanegol at eu pensiwn plentyn cymwys.