Cynllun Pensiwn Diffoddwyr Tân

Cewch optio allan o CPT 2015 ar unrhyw adeg os nad ydych yn dymuno bod yn aelod. Er mwyn gwneud hynny, rhaid ichi roi hysbysiad ysgrifenedig wedi ei lofnodi i’r GTA. Ystyrid wedyn eich bod wedi arfer yr opsiwn ar y dyddiad y mae’r GTA yn cael yr hysbysiad.

Os byddwch yn optio allan cyn diwedd 3 mis o gyflogaeth Gynllun ddi-dor, neu o fewn 3 mis ar ôl ailgofrestru yn awtomatig, byddwch yn cael eich trin fel pe na baech wedi bod mewn cyflogaeth bensiynadwy yn ystod y cyfnod hwnnw, a byddwch yn cael ad-daliad o’r cyfraniadau a dalwyd gennych ar gyfer y cyfnod hwnnw.

Os byddwch yn optio allan ar ôl cyfnod o 3 mis neu ragor o wasanaeth di-dor mewn cyflogaeth Gynllun, neu 3 mis neu ragor ar ôl ailgofrestru yn awtomatig, byddwch fel arfer yn cael eich trin fel pe baech wedi terfynu eich gwasanaeth pensiynadwy yn y Cynllun ar ddiwrnod cyntaf y cyfnod tâl sy’n dilyn yn union ar ôl y cyfnod yr optiwyd allan ynddo. Byddwch wedyn yn dod yn aelod gohiriedig o’r Cynllun o’r dyddiad hwnnw ymlaen a byddwch yn peidio â chael unrhyw ddiogelwch pellach o dan CPT 2015, ac eithrio’r hyn a ddarperir i aelod gohiriedig.

• Ad-daliad o Chyfraniadau

  Os ydych yn gadael CPT 2015 gyda llai na 3 mis o wasanaeth cymwys a heb hawl i unrhyw fudd-dal arall o dan CPT 2015, efallai byddwch yn gymwys i gael ad-daliad o’ch gyfraniadau, ond byddai’r cyfraniadau a dalwyd gennych yn cael eu dychwelyd drwy’r gyflogres, gydag addasiadau treth.

• Buddion Gohiriedig

  Os peidiwch â bod yn aelod actif o’r Cynllun cyn bod hawl gennych i gael taliad o fuddion ymddeol, a bod gennych o leiaf 3 mis o wasanaeth cymwys neu werth trosglwyddiad wedi ei dalu i mewn i’ch cyfrif pensiwn, byddwch yn dod yn aelod gohiriedig o’r Cynllun.

  Byddai’ch cyfrif aelod actif yn cael ei gau a bydd yn cynnwys gwerth eich cyfrif pensiwn ar y dyddiad gadael, wedi'i ail-brisio. Pe baech yn dychwelyd i aelodaeth Gynllun o fewn y 5 mlynedd nesaf ar ôl gadel, byddai’r cyfrif yn cael ei ailsefydlu, fel pe baech wedi parhau mewn gwasanaeth pensiynadwy yn ystod y toriad, ond heb gael unrhyw dâl pensiynadwy am y cyfnod hwnnw.

  Byddech yn dod yn gymwys i gael taliad o’ch pensiwn gohiriedig ar sail oedran pan gyrhaeddech yr oedran pensiwn gohiriedig, sef yr un oedran â’ch Oedran Pensiwn y Wladwriaeth (neu 65 os yw 65 yn uwch). Pe bai gennych gyfrif pensiwn ychwanegol, eich pensiwn ymddeol fyddai cyfanswm gwerth eich cyfrif pensiwn gohiriedig plws a’ch pensiwn ychwanegol, plws y mynegeio.

  Pe baech yn dymuno, gallech roi hysbysiad ysgrifenedig i’r GTA, i’w hysbysu yr hoffech gael eich pensiwn gohiriedig yn 55 oed neu ar ôl hynny ond cyn eich Oedran Pensiwn Gohiriedig. Mewn amgylchiadau o’r fath, fodd bynnag, byddai’r pensiwn yn ddarostyngedig i ostyngiad talu’n gynnar, ar sail ffactorau a ddarperid gan actiwari’r Cynllun.

  Neu os byddech, cyn cyrraedd Oedran Pensiwn Gohiriedig, yn dioddef o afiechyd i’r graddau y byddech yn analluog i ymgymryd â chyflogaeth reolaidd, a byddai’r analluogrwydd hwnnw’n parhau tan o leiaf yr Oedran Pensiwn Gohiriedig, gallech ofyn am dalu’r pensiwn gohiriedig yn gynnar ar sail afiechyd. Byddai’r penderfyniad ynghylch hawlogaeth yn cael ei wneud gan yr GTA ar ôl ystyried barn ysgrifenedig Ymarferydd Meddygol Cymwysedig Annibynnol.

  Pe bai taliad cynnar yn cael ei wneud ar sail afiechyd, byddai’r GTA yn cadw eich hawlogaeth i’r taliad cynnar dan adolygiad hyd nes byddech yn cyrraedd yr oedran pensiwn gohiriedig. Os deuai’r GTA i’r casgliad eich bod bellach wedi dod yn alluog i ymgymryd â chyflogaeth reolaidd, byddai’r taliad o’r pensiwn yn peidio. Pe bai’r taliad o’r pensiwn yn parhau, ni fyddai adolygu pellach yn ofynnol ar ôl cyrraedd yr oedran pensiwn gohiriedig; pe bai’r taliad yn cael ei atal yn dilyn adolygiad, byddai’r pensiwn yn cael ei adfer pan gyrhaeddid yr Oedran Pensiwn Gohiriedig.

• Trosglwyddo eich Buddion

  Os byddwch yn gadael eich cyflogaeth, gallwch ofyn am i’ch hawliau pensiwn gael eu cynnig i drefniant pensiwn arall, ar ffurf 'gwerth trosglwyddo'. Cyfrifir y gwerth trosglwyddo drwy gyfrifo gwerth y buddion gohiriedig ac yna ei addasu yn unol â ffactorau actiwaraidd.

  Yr hyn ydyw, mewn gwirionedd, yw gwerth eich hawliau pensiwn wedi ei fynegi ar ffurf cyfandaliad. Dylech gymharu’r cynnig o fuddion y byddai’r gwerth trosglwyddo yn ei brynu yn y cynllun newydd, gyferbyn ag unrhyw fuddion cyfatebol yn CPT 2015, cyn gwneud eich penderfyniad ynghylch trosglwyddo hawliau pensiwn.

  Mae’r egwyddorion uchod yn gymwys hefyd mewn perthynas â throsglwyddo hawliau pensiwn i GTA eraill yn Lloegr, yr Alban neu Ogledd Iwerddon. Fodd bynnag, os byddwch yn gadael eich cyflogaeth gydag un ATA yng Nghymru er mwyn trosglwyddo I GTA Cymreig arall, lle y byddwch yn parhau’n aelod o CPT 2015, bydd y trefniadau trosglwyddo yn wahanol. Ni fydd taliad trosglwyddo yn cael ei wneud. Bydd eich awdurdod blaenorol yn ddarparu tystysgrif i chi, sy’n datgan y cofnodion yn eich cyfrifon pensiwn a ddelir gan yr awdurdod hwnnw, ynghyd â manylion eich cyfnod o gyflogaeth bensiynadwy. Bydd hyn yn cael ei wneud yn awtomatig os na fu toriad rhwng eich cyflogaethau.

  Os bu toriad yn eich gwasanaeth pensiynadwy, a’r toriad yn ddim hwy na 5 mlynedd, byddai’r dystysgrif yn cael ei darparu ar ôl cael cais gennych chi. Rhaid i chi, wedyn, roi’r dystysgrif i’ch awdurdod newydd, fel y gall drosglwyddo’r manylion i’ch cyfrif pensiwn newydd gyda’r awdurdod
  hwnnw.

  Byddai angen gwneud trefniadau arbennig pe bai gennych fwy nag un gyflogaeth gyda’r naill awdurdod neu’r llall neu’r ddau; mae’n bosibl y byddai’n rhaid ichi ddewis o ba gyfrif, neu i ba gyfrif, y dylid trosglwyddo’r manylion. Gall eich awdurdod newydd esbonio hyn wrthych.

  Dalier Sylw

  Byddwch yn sicr eich bod chi'n deall effaith trosglwyddo hawliau pensiwn e.e. math a swm y pensiwn y bydd y trosglwyddiad yn ei 'brynu' yn y cynllun neu'r trefniant derbyniol, a'r termau y gallwch ei dynnu ohono.