Cynllun Pensiwn Diffoddwyr Tân

Os ydych yn aelod actif mewn Oedran Pensiwn Arferol (60) gallwch gymryd eich pensiwn unrhyw adeg ar neu ar ôl eich pen-blwydd yn 60. Wedyn, bydd eich cyfrif aelod actif ac unrhyw gyfrif pensiwn ychwanegol yn cael eu cau a chyfrif ymddeol yn cael ei sefydlu. Ni wneir unrhyw ostyngiad oherwydd talu’n gynnar, ac mae’n bosibl y rhoddir ychwanegiad oedran, os byddwch wedi parhau i wasanaethu ar ôl cyrraedd 60 oed.

Fodd bynnag, os ydych yn aelod actif, ond yn dymuno cael eich pensiwn cyn eich bod yn 60 oed, gallwch roi hysbysiad ysgrifenedig i’r Gwasanaeth Tân ac Achub (GTA), i’w hysbysu yr hoffech gael eich pensiwn pan gyrhaeddwch 55 oed neu ar ôl hynny. Yn yr amgylchiadau hynny, fodd bynnag, byddai’r ymddeoliad cynnar yn achosi gostyngiad yn eich pensiwn, a seilid ar ffactorau a ddarperid gan actiwari’r Cynllun.

Mae opsiwn ar gael hefyd ar gyfer 'ymddeol yn rhannol', unwaith y byddwch wedi cyrraedd 55 oed, os byddwch yn dymuno cael eich pensiwn ond parhau eich cyflogaeth fel diffoddwr tân heb doriad a chrynhoi pensiwn ychwanegol.

Byddai eich cyfrif aelod actif ac unrhyw gyfrif pensiwn ychwanegol yn cael eu cau, a’r pensiwn a ddelid yn y cyfrifon hynny yn cael ei dalu (yn ddarostyngedig i ostyngiad talu’n gynnar, os na fyddech wedi cyrraedd 60 oed). Byddai cyfrif aelod actif newydd yn cael ei agor, ar gyfer y pensiwn a fyddai’n crynhoi wrth ichi barhau eich aelodaeth. Byddai’r ail bensiwn hwnnw yn dod yn daladwy, ar delerau cyffelyb i’ch pensiwn cyntaf, bryd bynnag y byddech yn barod i’w gymryd.

Pan fyddwch yn ymddeol, bydd gennych yr opsiwn i gyfnewid rhan o'r pensiwn i ddarparu cyfandaliad (a elwir hefyd yn Gymudo). 

• Enillion Pensiynadwy

  Mae'r pensiwn a enillir a gredydwyd i'ch cyfrif pensiwn yn seiliedig ar eich Enillion Pensiynadwy (neu 'tâl pensiynadwy tybiedig', os yw'n berthnasol).

  Trinnir yr eitemau canlynol fel tâl pensiynadwy:

  • Tâl a gewch am gyflawni dyletswyddau eich rôl, ac eithrio unrhyw lwfansau neu enillion a delir ar sail dros dro;
  • eich enillion parhaol (gan gynnwys, yn achos diffoddwr tân wrth gefn, unrhyw lwfans cadw);
  • Y swm a hepgorwyd os ydych wedi cytuno i ildio’r hawl i gael rhan o’ch tâl pensiynadwy yn gyfnewid am fudd anariannol (cyfeirir at hyn weithiau fel 'aberthu cyflog');
  • Y swm a dalwyd am ddatblygiad proffesiynol parhaus os dyfarnodd yr awdurdod y dylai hwnnw fod yn bensiynadwy.

  Weithiau bydd tâl diffoddwr tân yn lleihau neu’n cael ei atal am gyfnod. Gall hyn effeithio ar yr asesiad o’r buddion. Mae CPT 2015 yn esbonio pa bethau gaiff eu cyfrif fel 'tâl pensiynadwy tybiedig' mewn amgylchiadau penodol, fel nad effeithir ar y buddion.

  Mae’r amgylchiadau hynny’n cynnwys absenoldeb salwch, absenoldeb anaf, absenoldeb cysylltiedig â phlentyn ac absenoldeb di-dâl. Mewn rhai o’r amgylchiadau, megis absenoldeb salwch ar dâl gostyngedig, cymhwysir y tâl pensiynadwy tybiedig yn awtomatig; mewn amgylchiadau eraill, e.e. absenoldeb salwch di-dâl, bydd cymhwyso’r tâl pensiynadwy tybiedig yn dibynnu ar i’r aelod wneud dewisiad i dalu, ac ar dalu, cyfraniadau am y cyfnod perthnasol.

  Dalier Sylw

  NI fydd yn unrhyw daliadau a wneir gan gyflogwr i aelod sydd ar absenoldeb gwasanaeth lluoedd wrth gefn yn cael eu hystyried yn dâl pensiynadwy.

• Cyfrif Pensiwn

  Pan fyddwch yn ymuno ag CPT 2015, bydd cyfrif pensiwn yn cael ei agor ar eich cyfer, a bydd yn parhau’n agored cyhyd ag y byddwch yn aelod sy’n cyfrannu i’r Cynllun.

  Os ydych yn aelod actif mewn mwy nag un gyflogaeth yr un pryd, bydd gennych gyfrif aelod actif ar gyfer pob un o’r cyflogaethau. Bydd eich pensiwn yn tyfu o flwyddyn i flwyddyn fel a ganlyn:

  1/61.4 x tâl pensiynadwy = credyd pensiwn enilledig

  Os cymerwn fod eich tâl pensiynadwy plws unrhyw dâl pensiynadwy tybiedig yn ystod eich blwyddyn gynllun gyntaf yn £29,850, byddai eich pensiwn enilledig am y flwyddyn honno yn:

  1/61.4 x £29,850.00 = £486.16

  Gweithredir 'addasiad mynegai' ar y swm hwn, sef cynnydd neu ostyngiad canran a bennir mewn Gorchymyn a ddyroddir gan Drysorlys EM, i adlewyrchu unrhyw newid cenedlaethol mewn enillion cyfartalog wythnosol. Gwneir yr addasiad er mwyn sicrhau, bob blwyddyn, fod y pensiwn sydd gennych yn eich cyfrif yn cadw ei werth o flwyddyn i flwyddyn.

  Os buoch yn absennol yn ystod y flwyddyn gynllun, ar dâl contractiol gostyngedig neu heb ddim tâl oherwydd salwch neu anaf, neu ar absenoldeb perthnasol gyda thâl mewn cysylltiad â phlentyn, neu absenoldeb gwasanaeth lluoedd wrth gefn, yna, am y cyfnod hwnnw, bydd eich pensiwn yn seiliedig ar eich tâl pensiynadwy tybiedig.

  Byddai eich cyfrif aelod actif yn parhau i dyfu yn y modd hwn cyhyd ag y byddech yn parhau’n aelod actif o’r Cynllun. Yn ogystal, pe baech yn parhau yn aelod actif o’r Cynllun y tu hwnt i oedran ymddeol arferol y Cynllun (sef 60 oed), byddai 'ychwanegiad oedran', sef swm ychwanegol o bensiwn, a gyfrifid yn unol â chanllawiau actiwari’r Cynllun, yn cael ei gredydu i’ch cyfrif.

  Dalier Sylw

  Os derbynnir taliad gwerth trosglwyddo o gynllun pensiwn arall, byddai'ch cyfrif pensiwn yn cael ei gredydu â swm sy'n cynrychioli'r gwerth trosglwyddo hwnnw, yn y flwyddyn cynllun y caiff ei dderbyn.

• Cyfnewid eich Pensiwn

  Ar eich ymddeoliad, os dymunwch, gallwch ildio rhan o’ch hawlogaeth flynyddol i bensiwn, a chael un cyfandaliad yn ei le. Gelwir hyn yn Gymudo.

  Mae cyfyngiadau, fodd bynnag, ar y swm y caniateir ei gymudo. Rhaid i’r gyfran o’r pensiwn a gymudir beidio â bod yn fwy na 25%, ac ni chaiff y cyfandaliad fod yn uwch na therfynau treth penodol, rhag achosi taliad trethadwy o’r cynllun. Os cedwir o fewn y terfynau hyn, bydd y cyfandaliad a geir drwy gymudo yn rhydd o dreth. Pan fyddwch yn ymddeol, gall eich gweinyddwr pensiynau eich cynghori ynglŷn â’r terfynau a fydd mewn grym ar y pryd.

  Yn ogystal, er y gellir cymudo pensiwn ymddeol, pensiwn gohiriedig neu bensiwn afiechyd haen isaf, ni ellir cymudo pensiwn afiechyd haen uchaf.

  Os byddwch yn dymuno manteisio ar yr opsiwn hwn i ddarparu cyfandaliad, rhaid ichi hysbysu’r awdurdod mewn ysgrifen cyn bo’r taliad cyntaf o bensiwn wedi ei wneud, gan nodi’r swm o bensiwn y dymunwch ei gymudo. Cewch gymudo cyn lleied neu cyn gymaint o’r pensiwn ag y dymunwch, ar yr amod eich bod yn cadw o fewn y terfynau. Wrth gymudo, am bob £1 y bydd eich cyfradd flynyddol o bensiwn yn gostwng, byddech yn cael £12 fel cyfandaliad.

  Er enghraifft

  Fod hawl gennych i gael pensiwn ymddeol o £16,000 y flwyddyn ac eich bod yn dewis cymudo’r gyfran fwyaf a ganiateir, sef un chwarter, h.y. £4,000. Os rhagdybir bod y terfynau treth yn caniatáu hyn, cyfanswm eich buddion fyddai:

  Pensiwn: £16,000.00 – £4,000.00 = £12,000 y flwyddyn

  Cyfandaliad: £4,000.00 x 12 = £48,000

  Dalier Sylw

  Er y gellir cymudo pensiwn afiechyd ymddeol, gohiriedig neu haen is, NI ALLWCH gymudo pensiwn afiechyd haen uwch.