Cynllun Pensiwn Diffoddwyr Tân

Os ydych yn marw yn ystod eich gwasanaeth a chithau’n aelod o GDT 1992, bydd grant marwolaeth yn daladwy. Fel arfer bydd hwnnw’n ddwywaith eich cyflog pensiynadwy ar ddyddiad y farwolaeth neu, os oeddech yn absennol yr adeg honno, ddwywaith waith eich cyflog pensiynadwy yn union cyn i’ch absenoldeb ddechrau. Os ydych yn gweithio’n rhan-amser bydd y cyflog pensiynadwy yn ôl y raddfa ran-amser.

Mae rheolau treth yn atal talu grant marwolaeth mewn perthynas ag unigolyn sydd wedi cyrraedd 75 oed ond mae’n annhebygol y byddai diffoddwr tân yn dal i wasanaethu yn yr oed hwnnw.

Byddai’r Gwasanaeth Tân ac Achub (GTA) yn talu'r grant marwolaeth i'ch briod neu bartner sifil cyfreithiol a bwrw nad oeddech yn byw ar wahân adeg y farwolaeth. (Mae hyn yn golygu mwy na gwahaniad corfforol e.e. a fyddai’n wir yn achos diffoddwr tân i ffwrdd o gartref yn mynychu cwrs hyfforddiant; mae’n awgrymu bod o leiaf un o’r pâr priod neu’r partneriaid yn cydnabod bod y briodas neu’r bartneriaeth wedi dod i ben).

Os ydych yn ddi-briod, heb fod mewn partneriaeth sifil, a heb fod yn byw ar wahân, bydd y grant marwolaeth yn cael ei dalu i’w gynrychiolydd personol.

• Buddion Goroeswyr

  Pan fo aelod o GDT 1992 yn marw (naill ai cyn neu ar ôl ymddeol), os yw wedi cwblhau 2 flynedd o leiaf o wasanaeth pensiynadwy bydd pensiwn yn cael ei dalu i’r priod sy’n goroesi.

  A bwrw nad yw’r gŵr a’r wraig yn byw ar wahân bydd pensiwn y gŵr gweddw/gwraig weddw yn achos aelod o’r cynllun sydd mewn swydd yn hanner cyfanswm y pensiynau salwch haen is a haen uwch y byddai’r diffoddwr tân wedi bod â hawl iddo pe byddai wedi ymddeol ar sail salwch ar ddyddiad y farwolaeth. Yn achos aelod o’r Cynllun sydd wedi ymddeol, lle’r oedd y briodas wedi'i chynnal cyn i’r ymadawedig beidio â bod yn ddiffoddwr tân; hanner pensiwn y cyn-ddiffoddwr tân fel y’i cyfrifir cyn ei leihau ar gyfer cyfnewid; ac yn achos diffoddwr tân, neu gyn-ddiffoddwr tân sydd â hawl i bensiwn gohiriedig nad oedd yn cael ei dalu ar ddyddiad y farwolaeth; hanner y pensiwn gohiriedig. Os oedd yr aelod o GDT 1992 wedi gweithio’n rhan-amser caiff hynny ei ystyried wrth asesu’r pensiwn i’r gŵr gweddw/gwraig weddw.

  Am y 13 wythnos gyntaf yn dilyn marwolaeth aelod, bydd pensiwn y priod neu’r partner sifil, gan gynnwys unrhyw Fudd-daliadau Pensiwn Ychwanegol i oroeswyr, yn cael ei ychwanegu i lefel cyflog pensiynadwy yr ymadawedig (marwolaeth mewn swydd) neu i lefel y pensiwn a dalwyd (marwolaeth wedi dechrau derbyn pensiwn). Nid yw’r ychwanegiad yn berthnasol i bensiwn gohiriedig nad oedd yn cael ei dalu ar ddyddiad y farwolaeth. Os nad oes pensiwn yn daladwy i briod neu bartner sifil ond mae pensiwn yn daladwy i blentyn, bydd y swm atodol yn cael ei ychwanegu at y pensiwn hwnnw.

  Dalier Sylw

  Os yw aelod o GDT 1992 yn marw (cyn neu ar ôl ymddeol) ac yntau/hithau mewn partneriaeth sifil gofrestredig, byddai gan y partner sy’n goroesi hawl i bensiwn ar sail yr egwyddorion tebyg i’r rheiny a nodwyd ar gyfer gŵr gweddw/gwraig weddw ond byddai’n adlewyrchu’r gwasanaeth ers 6 Ebrill 1988 yn unig.

  NA fydd pensiwn goroeswr yn dod yn daladwy i bartner cyd-fyw o dan GDT 1992.

• Pensiynau Plant

  Pan fo aelod o Gynllun 1992 yn marw (cyn neu ar ôl ymddeol) mae pensiwn yn cael ei dalu i blentyn cymwys. Asesir cymhwysedd y plentyn ar ei ddibyniaeth ar yr aelod o’r cynllun – rhaid i’r plentyn fod yn ddibynnol ar ddyddiad y farwolaeth, ac:

  • yn blentyn o briodas neu bartneriaeth sifil yr aelod o Gynllun 1992 (pan fo’r briodas neu’r bartneriaeth sifil wedi’u cynnal ar neu gyn y diwrnod olaf o wasanaeth);
  • yn blentyn mabwysiedig (pan fo’r mabwysiadu wedi digwydd ar neu gyn y diwrnod olaf o wasanaeth);
  • yn llysblentyn (pan fo’r diffoddwr tân a rhiant y plentyn ar neu gyn y diwrnod olaf o wasanaeth wedi priodi neu lunio partneriaeth sifil ac yr oedd y plentyn yn ddibynnol ar y diffoddwr tân ar ôl hynny); neu
  • unrhyw blentyn arall a bwrw bod y plentyn yn sylweddol ddibynnol ar y diffoddwr tân a hynny ar y diwrnod olaf o wasanaeth ac ar ddyddiad y farwolaeth (os yn wahanol).

  Rhaid hefyd ystyried oed y plentyn. Os yw’r plentyn o dan 18 oed, mae’r pensiwn yn daladwy ym mhob achos. Os yw'r plentyn yn 18 neu’n hŷn a dan 23, mae’r pensiwn yn daladwy yn unig, os oedd y plentyn mewn addysg llawn amser neu’n barhaol anabl ar ddyddiad y farwolaeth ac wedi bod felly ers hynny. Wedi cyrraedd 23 oed, mae’r pensiwn yn daladwy yn unig os oedd y plentyn yn barhaol anabl ar ddyddiad y farwolaeth ac wedi bod felly ers hynny.

  Bydd swm y pensiwn sy’n daladwy yn dibynnu ar nifer y plant cymwys ac a oes gan y plentyn neu blant riant sy’n goroesi.