Cynllun Pensiwn Diffoddwyr Tân

Os ydych yn marw mewn swydd a chithau’n aelod o CPT 2007, bydd grant marwolaeth yn daladwy. Fel arfer bydd hwnnw’n 3 gwaith eich cyflog pensiynadwy ar ddyddiad y farwolaeth. Os ydych yn gweithio’n rhan-amser bydd y grant marwolaeth sy’n daladwy 3 gwaith eich cyflog pensiynadwy pro rata.

Er nad yw’r grant marwolaeth ond yn daladwy pan fo’r diffoddwr tân yn aelod gweithredol o CPT 2007, mewn achos o farwolaeth yn digwydd ar ôl i bensiwn ddechrau cael ei dalu, caiff gwerth 5 mlynedd o bensiwn ei dalu yn gyfandaliad, yn eithaf tebyg i grant marwolaeth.

Os bydd diffoddwr tân yn marw wedi ymddeol ac y mae wedi derbyn pensiwn am lai na 5 mlynedd, mae grant marwolaeth yn daladwy. Y swm a delir yw’r gwahaniaeth rhwng y pensiwn a dderbyniwyd eisoes a’r swm fyddai wedi cael ei dalu dros y cyfnod o 5 mlynedd.

Mae gan y gwasanaeth tân ac achub ddisgresiwn absoliwt o ran i bwy y mae’n talu’r grant marwolaeth ond gall ystyried unrhyw enwebiad a wnaed.

Beth os wyf yn Ddiffoddwr Tân Wrth Gefn?

Seilir y grant marwolaeth sy’n daladwy os byddwch yn marw mewn swydd, ar gyfran eich cyflog pensiynadwy cyfwerth ag amser llawn, wedi’i addasu yn ôl eich gwasanaeth pensiynadwy. Mae’r grant marwolaeth yn 3 gwaith y swm hwnnw.

• Buddion Goroeswyr

  Pan fo aelod o CPT 2007 yn marw (naill ai cyn neu ar ôl ymddeol), bydd pensiwn yn cael ei dalu i briod, partner sifil, partner cyd-fyw neu blentyn sy’n goroesi.

  Os oedd yr ymadawedig yn aelod o CPT 2007, bydd y pensiwn i briod neu bartner yn hanner y budd-daliadau haen uwch y byddai’r diffoddwr tân â hawl iddynt pe byddai wedi ymddeol ar sail salwch ar ddyddiad y farwolaeth. Bydd y pensiwn i blentyn yn chwarter yr un swm; pan fo mwy nag un plentyn cymwys, bydd y pensiwn yn hanner yr un swm wedi’i rannu’n gyfartal rhwng y plant.

  Os yw’r ymadawedig wedi gadael CPT 2007 gyda hawl i bensiwn gohiriedig, ond ni ddechreuwyd talu’r pensiwn, bydd pensiwn i briod neu bartner yn hanner y pensiwn gohiriedig. Bydd y pensiwn i blentyn yn chwarter y pensiwn gohiriedig; pan fo mwy nag un plentyn cymwys, bydd y pensiwn yn hanner y pensiwn gohiriedig wedi’i rannu’n gyfartal rhwng y plant.

  Os oedd yr ymadawedig yn derbyn pensiwn adeg y farwolaeth, bydd y pensiwn i briod neu bartner yn hanner y pensiwn. Bydd y pensiwn i blentyn yn chwarter y pensiwn; pan fo mwy nag un plentyn cymwys bydd y pensiwn yn hanner y pensiwn wedi’i rannu’n gyfartal rhwng y plant. (Y pensiwn fydd gwerth y pensiwn cyn unrhyw leihad ar gyfer taliad cynnar ond ar ôl cyfnewid).

  Mae pensiwn i briod neu bartner yn daladwy am oes, hyd yn oed os yw’n priodi, ailbriodi, llunio partneriaeth sifil neu bartneriaeth sifil arall. Hefyd nid oes gwahaniaeth yn y driniaeth os oedd y briodas/partneriaeth wedi cychwyn cyn neu ar ôl ymddeoliad yr aelod o’r cynllun.

  Dalier Sylw

  Os yw’r priod neu bartner fwy na 12 mlynedd yn iau na’r ymadawedig, bydd y pensiwn i briod neu bartner yn cael ei leihau yn ôl 2.5% am bob blwyddyn neu ran o flwyddyn dros 12 mlynedd, hyd at uchafswm o 50%.

  Am y 13 wythnos gynaf yn dilyn marwolaeth, bydd y pensiwn i briod neu bartner yn cael ei ychwanegu hyd at lefel cyflog pensiynadwy yr ymadawedig (marw mewn swydd) neu i’r pensiwn oedd yn cael ei dalu (marwolaeth wedi dechrau derbyn pensiwn).

• Pensiynau Plant

  Pan fo aelod o CPT 2007 yn marw (cyn neu ar ôl ymddeol) mae pensiwn yn cael ei dalu i blentyn cymwys. Asesir cymhwysedd y plentyn ar ei ddibyniaeth ar yr aelod o’r Cynllun – rhaid i’r plentyn fod yn ddibynnol ar ddyddiad y farwolaeth, ac:

  • yn blentyn o briodas neu bartneriaeth sifil yr aelod o CPT 2007 (pan fo’r briodas neu’r bartneriaeth sifil wedi’u cynnal ar neu gyn y diwrnod olaf o wasanaeth);
  • yn blentyn mabwysiedig (pan fo’r mabwysiadu wedi digwydd ar neu gyn y diwrnod olaf o wasanaeth);
  • yn llysblentyn (pan fo’r diffoddwr tân a rhiant y plentyn ar neu gyn y diwrnod olaf o wasanaeth wedi priodi neu lunio partneriaeth sifil ac yr oedd y plentyn yn ddibynnol ar y diffoddwr tân ar ôl hynny); neu
  • unrhyw blentyn arall a bwrw bod y plentyn yn sylweddol ddibynnol ar y diffoddwr tân a hynny ar y diwrnod olaf o wasanaeth ac ar ddyddiad y farwolaeth (os yn wahanol).

  Rhaid hefyd ystyried oed y plentyn. Os yw’r plentyn o dan 18 oed, mae’r pensiwn yn daladwy ym mhob achos. Os yn 16 neu’n hŷn a dan 23, mae’r pensiwn yn daladwy yn unig os yw’r plentyn mewn addysg llawn amser neu’n barhaol anabl ar ddyddiad y farwolaeth ac wedi bod felly ers hynny. Wedi cyrraedd 23 oed, mae’r pensiwn yn daladwy yn unig os oedd y plentyn yn barhaol anabl ar ddyddiad y farwolaeth ac wedi bod felly ers hynny.

  Mae swm y pensiwn fydd yn daladwy yn dibynnu ar nifer y plant cymwys ac a oes gan y plentyn neu blant riant sy’n goroesi.