Cynllun Pensiwn Diffoddwyr Tân

Os nad ydych yn dymuno bod yn aelod yn CPT 2007, gallwch adael unrhyw adeg drwy roi rhybudd ysgrifenedig i’r Gwasanaeth Tân ac Achub (GTA). Bydd y rhybudd yn dod i rym o’r dyddiad cyflog nesaf.

Os oes gennych lai na 3 mis o wasanaeth cymwys pan ddaw’r rhybudd i rym, fel arfer bydd y cyfraniadau a daloch yn cael eu had-dalu i chi. Os oes gennych 3 mis neu fwy o wasanaeth cymwys, mae’r dewis gennych i drosglwyddo’r hawliau pensiwn a gronnwyd i drefniant pensiwn arall, neu pensiwn gohiriedig.

Ni fyddech mwyach yn derbyn buddion CPT 2007 (heblaw am y rheiny a ddarperir gan bensiwn gohiriedig). Os yn y man, y byddwch yn newid eich meddwl ac yn dymuno ail ymuno, byddwch wedyn yn ymuno a CPT 2015. Bydd eich dewis i ail ymuno yn dod i rym ddechrau’r cyfnod cyflog nesaf.

• Ad-daliad o'ch Cyfraniadau

  Gellir ad-dalu eich cyfraniadau i chi yn unig, os nad ydych yn gymwys i dderbyn un o’r mathau o bensiwn a gynigir gan y cynllun. Golyga hyn y gellir ad-dalu’r cyfraniadau i chi yn unig os:

  • mae gennych lai na 3 mis o wasanaeth cymwys yn CPT 2007; a
  • nid ydych wedi cyrraedd oed pensiwn y Wladwriaeth; a
  • nid oes hawliau pensiwn personol wedi cael eu trosglwyddo i’r cynllun.

  Os ydych yn gymwys i dderbyn ad-daliad, cyfanswm yr holl gyfraniadau a dalwyd gennych chi fydd y swm hwnnw. NI fydd cyfraniadau a dalwyd gan unrhyw gyflogwr yn cael eu talu i chi.

  Dalier Sylw

  Bydd treth yn cael ei dynnu o’r ad-daliad yn ôl graddfa o 20%.

• Buddion Gohiriedig

  Os ydych yn gadael o CPT 2007 (naill ai oherwydd nid ydych mwyach yn ddiffoddwr tân neu rydych wedi dewis gadael y Cynllun) ac mae gennych ddigon o wasanaeth i fod yn gymwys i dderbyn pensiwn, ond nid ydych yn gymwys i’w dderbyn yn ddi-oed gan nad ydych yn ddigon hen nac yn ymddeol ar sail salwch, bydd gennych hawl i bensiwn gohiriedig a gyfrifir fel a ganlyn:

  1/60fed x gwasanaeth pensiynadwy x cyflog pensiynadwy terfynol = pensiwn blynyddol

  Nid yw pensiwn gohiriedig yn cael ei dalu’n ddi-oed. Fel arfer caiff ei dalu ar gyrraedd 65 oed. Gallech serch hynny ofyn am iddo gael ei dalu’n gynharach o 55 oed ymlaen. Os bydd y Gwasanaeth Tân ac Achub (GTA) yn cytuno i’w dalu’n gynharach, bydd y pensiwn yn cael ei dalu’n ddi-oed, ond byddai’n cael ei leihau yn ôl yr un raddfa â phensiwn ymddeol a delir yn gynharach ar gais yr aelod.

  Os yw diffoddwr tân sydd â hawl i bensiwn gohiriedig yn dioddef salwch parhaol cyn bo’r pensiwn i gael ei dalu, ac os yw’r salwch yn golygu na all gyflawni gwaith rheolaidd (h.y. prawf cyffelyb i’r un fyddai’n pennu a yw diffoddwr tân yn gymwys ar gyfer pensiwn salwch haen uwch), gellir talu pensiwn gohiriedig yn ddi-oed heb ei leihau. (Fodd bynnag, yn wahanol i bensiwn salwch haen uwch, NI fyddai ychwanegiad i’r gwasanaeth).

• Trosglwyddo eich Buddion

  Os ydych yn gadael CPT 2007 gyda digon o wasanaeth i fod yn gymwys i dderbyn pensiwn, ond nid ydych yn gymwys i daliad yn ddi-oed gan nad ydych yn ddigon hen nac yn ymddeol ar sail salwch, yn lle cael pensiwn gohiriedig, gallech ofyn am i’ch hawliau pensiwn gael eu trosglwyddo i drefniant pensiwn arall.

  Bydd gwerth trosglwyddo ar sail gwerth cyfalaf eich hawliau pensiwn yn cael ei asesu yn unol â’r canllawiau a ddarperir gan Actiwari’r Llywodraeth.

  Gallwch adael eich swydd gyda’R Gwasanaeth Tân ac Achub (GTA) presennol er trosglwyddo i GTA arall, lle rydych yn dal i fod yn aelod o CPT 2007.

  Dalier Sylw

  Mae'r Llywodraeth wedi gwahardd unrhyw drosglwyddiadau o gynlluniau pensiwn gwasanaeth cyhoeddus heb eu hariannu (megis y Cynlluniau Pensiwn Tân) i Gynlluniau Pensiwn Cyfraniad Diffiniedig a threfniadau budd-daliadau hyblyg eraill o'r 6ed Ebrill, 2015.